ملف العناية بالبشرة خلال فصل الشتاء

أكيد كلنا بنتعرض للميه كل شوية يعني علشان الوضوء أو غسل الأيدي مثلا، وعلشان كده عايزاك تبقي ذكية وكل ما تعرضي بشرتك للميه تنشفيها بالراحة بفوطة ناعمة وبأكد كلامي فوطة ناعمة، واوعي تسيبيها من غير ما تنشفيها لأن ده هيزود جفافها ويعرضها للتقشف.

وفيه حاجة كمان حلوة ممكن تعمليها وهي إنك تدلكي إيدك ووشك بأي كريم مرطب بعد ما تغسليهم، وكمان عايزاك تاخدي بالك من حاجة مهمة قوووي وهي إنك ماتغسليش وشك أو تستحمي مثلا وتخرجي في الهواء البارد على طول، لا اقعدي في البيت لمدة ساعتين وبعد كده اخرجي.

نشوف مع بعض المشاكل التى ممكن ان تواجهك فى الشتاء وكيفيه حلها

أكيد كلنا في الشتاء بعد ما بناخد دش بنحس إن جلدنا بقى جاف قوي ومش بيلمع..

والحل يا ستي إنك تدلكي جسمك قبل الاستحمام بربع ساعة بزيت زيتون وبعد كده خدي الدش بتاعك عادي بس ياريت بعد ما تخلصي الاستحمام بالماء الفاترة تاخدي دش تاني بماء باردة وبعد ما تخلصي الدش نشفي جسمك بفوطة ناعمة وبعد كده ابدأي في وضع كريمات مرطبة على جسمك وهتشوفي الفرق بنفسك.
_________________

المشكلة التانية
جفاف جلد الوجه

برضه أكيد ساعات بتلاقي بشرة وشك في الشتاء مشدودة وجافة وبتجربي كريمات كتير وبرضه مفيش فايدة..

والحل هو إنك تجربي أي ماسك يعجبك من الماسكات دي وتتخلصي من المشكلة دي نهائي..


ماسك الزبدة لعلاج جفاف البشرة

المكونات :

• معلقة صغيرة زبدة
• معلقة كبيرة ماء

الطريقة:اخلطي ملعقة صغيرة من الزبدة مع ملعقة ماء وقلبيهم مع بعض كويس وبعد كده ادهني بيها وشك لمدة ربع ساعة وبعد كده اغسلي وشك بالماء الفاترة وكرري الماسك ده مرتين في الأسبوع وهتشوفي الفرق بنفسك.

ماسك العسل بالليمون

والماسك ده بالإضافة إلى إنه بيساعد على علاج مشكلة جفاف البشرة كمان بيساعد على ترطيب البشرة وزيادة نعومتها..

المشكلة الثالثة
شحوب البشرة

ماسك البرتقال

المكونات:

• عصير نصف برتقالة
• 3 معالق عسل

الطريقة:سخني العسل مع عصير البرتقال على نار هادئة لغاية ما تلاقي العسل ذاب، بعد كده شيليه من على النار وسيبيه شوية لغاية ما تلاقيه برد، وبعد كده حطيه على وشك لمدة ربع ساعة وبعدين امسحي وشك بقطنة مبلولة بالماءالفاترة وكرري الماسك ده مرتين في الأسبوع وهتلاقي وشك بقى حاجة تانية خالص.
_______________

المشكلة الرابعة
خشونة جلد اليدين وتشققه

دي مشكلة بتعاني منها بنات كتير جداا طووول الشتاء كل ما تيجي تسلمي على واحدة تلاقي إيديها خشنة قوووي.

والحل هو الماسك ده.

ماسك عصير الليمون

كل اللي عليك إنك تعصري نصف ليمونة على باطن إيدك وبعد كده تاخدي العصير ده وتدعكي بيه إيدك وبعد مرور 10 دقائق تشطفي إيديك بالماء الفاترة، وكرري العملية دي كل يوم وبعد مرور أسبوع هتلاقي بشرة إيدك رجعت لها النعومة وبقت أنعم من الحرير.
____________________

المشكلة الخامسة
خشونة كعب القدمين وتشققه

دي مشكلة كمان ممكن تقابلك وده لأن جلد كعب القدمين ضعيف جدا وبيتأثر بالبرودة قوووي.

والحل بسيط جدًا وهو..

حمام المياه والفازلين

ضعي رجليكِ في مياه تكون فاترة لمدة عشر دقائق وبعد كده ادعكي رجليكِ بالحجر بعد ما تتأكدي من إزالة كل الجلد الميت نشفي رجلكِ كويس وضعي طبقة سميكة من الفازلين على كعوب رجلك وبعد كده البسي كيس بلاستيك في رجلكِ وعليه شراب وسيبيه لمدة نص ساعة أو نامي به وقومي الصبح وهتلاقي الفرق بنفسك.
________________

المشكلة السادسة تشقق الشفايف

فيه كمان مشكلة ممكن تقابك في الشتاء وهي مشكلة تشقق الشفايف وده لأن زي ما أنت عارفة جلد الشفايف جلد رقيق جدا وبيتأثر بأي حاجة بسرعة علشان كده بتلاقيه هو أول حاجة بتتأثر بانخفاض درجات الحرارة.

والحل
شوفي يا قمر قدامك أكتر من حل وأنتى اختاري المناسب لكى:
1- أول حاجة احرصي طول الشتاء على استخدام زبدة كاكاو لأنها بتقي الشفايف من الجفاف وبترطب الشفايف.
2- تحطي طبقة من "الفازلين" على الشفايف بعد غسلها وتنشيفها.
3- ادعكِ شفايفك كل يوم بالليل بالطحينة وعلى فكرة الطحينة مش بس هتعالج التشققات دي هتعالج كمان أي التهابات موجودة.
4- ادعكِ شفايفك بعسل النحل كل يوم الصبح.
_________________

المشكله السابعه تشقق جلد الكوعيين

من ضمن المشاكل اللي ممكن تتعرضي ليها في الشتاء مشكلة تشقق جلد الكوعين


ودي حلها ماسك زيت القرفة

المكونات:
3 نقط زيت قرفة (من عند العطار)
8 معالق كبيرة زيت مشمش (من عند العطار)

الطريقة:
ضعي المكونات السابقة مع بعضها في زجاجة واقفليها كويس ورجي الزجاجة دي كويس علشان المقادير دي تتخلط مع بعضها، وبعد كده ادهني الأماكن المصابة بالجفاف والتشقق وبعد مرور نص ساعة اغسليها بالماء الفاتر وكرري الماسك ده مرة كل أسبوع
اتمنا ينال اعجابكم